Aqyarda Rusiye mahkemesi eki yerli qadınnı «devlet hainliginde» qabaatlap mahkeme etecek, dep haber ete Rusiye kontrolindeki şeer prokuraturası.
Berilgen malümatqa köre, dava 42 yaşında qadın ve 24 yaşında qızına qarşı açıldı.
«Tahqiqat versiyasına köre, yaş qadın para alıp, Rusiye Federatsiyasına qarşı Ukrayina vekillerinen gizli işbirligi yapmağa qarar berdi. Bu faaliyetke anasını da celp etti. 2023 senesi sentâbr ayında anası çıqarğan Rusiye Federatsiyası Silâlı Quvetleri obyektleriniñ fotoresimlerini Ukrayina Mudafaa nazirligi Baş istihbarat idaresi kontrolindeki internet messencerinde kanal vastasınen yolladı», – dep aytıla haberde.
Qabaatlanğanlarnıñ ad ve soyadları aytılmay, olarnıñ izaatları da yoq. Qabaatları isbatlansa, Rusiye Federatsiyası Ceza kodeksiniñ 275-inci maddesine istinaden 20 yılğa azatlıqtan marum etile bile.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
