Rusiye uquq qoruyıcıları «Eski Qırım» mustaqil musulman cemiyetiniñ reisi İdris Yurdamovğa oña qarşı memuriy protokol tizilgenine dair haber berdi, dep haber ete «Qırım birdemligi». Onı «ekstremist malümatını saqlağanından» şübheli sayalar.
Qayd etilgenine köre, iyünniñ 5-nde «E» Merkeziniñ hadimleri «Zubeyr-Camige» kelip, binanı baqqanlar ve bu «standart bir teşkerüv» olğanını bildirgenler.
«İyünniñ 11-nde polis hadimleri Yurdamovnı tenbilemege keldi, amma cami bir qaç aydan berli Qırım musulmanları diniy idaresi vekilleriniñ kontroli altında buluna. Vesiqada «yapılğan teşkerüvde» «Eski Qırım» reisiniñ areketlerinde Rusiye Federatsiyası Memuriy uquq bozuvları kodeksiniñ 20.29 maddesine istinaden (ekstremist malümatlarını azırlav ve tarqatuv) alâmetler bar», – dep aytıla haberde.
İyünniñ 13-nde protokol tizilmesi içün «E» Merkeziniñ bölügine kelmek talabınen vesiqanı bölük yolbaşçısı Ruslan Şambazov imzaladı. O, qırımtatar faalleri, aq qorçalayıcılar, jurnalist ve din adamlarına qarşı memuriy davalarnıñ açılışında iştirak etken edi, dep qayd ete «Qırım birdemligi».
«Hadim «Eski Qırım» cemiyeti Eski Qırımdaki «Zubeyr-Caminen» bağlı», anda ise yasaqlanğan edebiyat cedvelinden kitaplar tapılıp alınğan edi, dep qayd etken edi. Laf Said Nursiniñ «Risale-i Nur» «Munacat (Dua). Üçünci nur» ve Takiuddin an-Nabhaniniñ «İslâm sisteması» kitabı aqqında kete. Hadimniñ fikirince, «Eski Qırım» «ekstremist malümatını kütleviy şekilde tarqatmaq maqsadınen saqladı» ve böyle malümatnı azırlav ve tarqatuv maddesini (Rusiye Federatsiyası Memuriy uquq bozuvları kodeksiniñ 20.29 maddesi) bozdı», – dep haber etti faaller.
2024 senesi mart ayınıñ soñunda Qırımnıñ İslâm Terek rayon mahkemesi cemiyetke bu protokol boyunca 100 biñ ruble para cezasını berdi. Mayıs ayında ise Rusiye kontrolindeki Qırım Yuqarı mahkemesi bu qararnı tasdıqladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
