Ukrayina cenkni toqtatuv uzlaşuvından vazgeçse, daa çoq topraqnı coyar. Bu aqta İstanbuldaki muzakerelerde Rusiye muzakere gruppasınıñ yolbaşçısı olğan Rusiye prezidentiniñ yardımcısı Vladimir Medinskiy The Wall Street Journal gazetasına bergen intervyüsında ayttı.
O, Rusiye barışıq istey, amma Ukrayina «diger memleketlerniñ milliy menfaatlarına emiyet bermege» devam etse, «cevap bermek mecbur», dep bildirdi.
«Ne yazıq ki, bu zıddiyet [Ukrayina ile] farqlarımıznı terenleştire, ve şu sebepten daa tez bitmesini isteymiz», – dep bildire aytqanlarını gazetası.
Medinskiy 18-inci asırda Rusiye ve İsveçiya arasında 21 yıldan ziyade devam etken Şimaliy cenkni hatırlatıp, Rusiye devamlı cenkke azır, dep ayttı.
Böyle bir qıyaslavnı diplomat Ukrayina ile muzakerelerde de qullanğan edi, dep haber etken edi The Economist jurnalisti Oliver Kerroll. O muzakerelerde, jurnalistniñ menbalarına esaslanıp bildirgenine köre, Medinskiy Rusiye «ebediy» cenkke azır, dep bildirgen edi.
Ukrayina ile muzakerelerde Moskva Kyivden Qırım, Aqyar, Donetsk, Zaporijjâ, Lugansk ve Herson vilâyetleriniñ ilhaqını olarnıñ memuriy sıñırlarında tanımasını talap ete. Kyiv bu şartlarnı qabul etilemez dep adlandıra.
Ukrayina prezidenti Volodımır Zelenskıy topraq meselesini Putinnen şahsen muzakere etecek, dep bildirdi. Onıñ aytqanına köre, uquq ceetinden ilhaq iç bir şartnen qabul etilmeycek.
ABD israrınen Moskva ve Kyiv mayıs ayında Rusiyeniñ büyük istilâsı başlanğanından berli ilk sefer doğrudan muzakere başlattı, amma cenkni toqtatuv añlaşması yolunda daa ciddiy bir ilerilevge irişemediler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
