"Krımskiy injir / Qırım inciri" edebiy leyhası ukrayin ve qırımtatar tillerinde yazğan müellifler içün altıncı er yıllıq yarışnıñ başlanuvını ilân etti. Leyhanıñ ilânında aytıla ki, işler ilk küz ayınıñ 30-na qadar qabul etilecek.
Yarış Ukrayina, vaqtınca işğal etilgen topraqlar, şu cümleden Qırım, em de diaspora müellifleri içün meydançıq yarata. Ukrayin ve qırımtatar tilleri arasında tercimelerniñ inkişafına ayrı diqqat ayırıla, bu ise biri-birini añlamağa ve medeniy integratsiyağa yardım ete.
YARIŞNIÑ NOMİNATSİYALARI:
- Qırım aqqında ukrain tilinde yazılğan eserler;
- Qırımtatar tilinde nesir eser (çeşit mevzularda);
- Ukrayin ya da qırımtatar tilinde yazılğan Qırım mevzusında esse;
- Qırım aqqında ukrain tilinde yazılğan şiiriy eser;
- Qırım tatar tilinde yazılğan şiiriy eser (çeşit mevzularda);
- Balalar içün edebiyat – balalar içün Qırım mevzusında ukrain tilinde yazılğan eser ya da balalar içün qırımtatar tilinde türlü mevzudaki eserler;
- Bediy eserniñ ukrain tilinden qırımtatar tiline, ya da aksine yapılğan, tercimesi.
Eserlerge ukrayin ve qırımtatar yazıcıları, edebiyatşınasları, muhbirler ve cemaat erbaplarından ibaret jüri qıymet kesecek: Alim Aliyev, Anastasiya Levkova, İvan Andrusâk, Katerina Kalitko, Andrey Kurkov, Bekir Mamutov, Mayye Safet ve Mamure Çabanova.
Eserleriñizni 2025 senesi ilk küz ayınıñ 30-nace, qirim.inciri@gmail.com adresine doc, docx, rtf, odt, txt formatlarınıñ birinde qoşma fayl tarzında yollanılması rica etile.
Yarışnıñ ğalipleri 10 000 ğrn para mukâfatınen taqdirlenecek. Eñ eyi eserler "Qırım inciri" antologiyasında basılacaqlar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
