İşğal etilgen Qırımda Canköy rayonınıñ 28 yaşında sakini «devlet hainliginde» qabaatlandı. Rusiye uquq qoruyıcıları onı Ukrayina istihbaratına çalışqanından şübheli saya, dep haber ete Rusiye kontrolindeki yarımada prokuraturası.
Berilgen malümatqa köre, 2024 senesi mart ayında qadın Qırımda ava mudafaa ve Rusiye arbiyleriniñ yerlerini fotoğa çıqardı. Dava malümatına köre, oña 15 biñ ruble (4500 ğrıvnâ) miqdarında para berildi.
«Mahsus arbiy operatsiyanıñ (Rusiye Ukrayinağa qarşı cenkni böyle adlandıra – QA) keçirilüvine qarşı çıqıp, qabaatlanğan qadın içtimaiy ağlardan birinde Ukrayina Mudafaa nazirligi Baş istihbarat idaresiniñ vekilleri tarafından idare etilgen toplulıqqa qoşuldı. Kanal reberinen bağlanıp, qadın Rusiye Federatsiyası Silâlı quvetleriniñ ava mudafaasınıñ vastaları ve askerleriniñ yerlerini fotoresimlerge çıqardı», – dep aytıla Rusiye prokuraturasınıñ haberinde.
Prokuratura qadınnıñ adı ve soyadını derc etmey. İzaatları da yoq.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
Aq qorçalayıcılar Rusiye uquq qoruyıcıları açqan devlet hainligi, işbirligi ve casuslıq davaları bir qaç qat artacaqtır, dep tahmin ete. Şimdi FSB aman-aman er kün böyle davalar aça, 2014 senesine qadar olarnıñ sayısı yılda eñ çoq 10 edi. Ukrayinağa qarşı büyük istilâdan soñ devlet hainligi maddesi Rusiyede cenkke qarşı çıqqanlarğa qarşı qullanılğan maddelerden eñ populârı oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
