Rusiye arbiyleri iyünniñ 12-ne keçer gecesi Ukrayinağa 63 Shahed uçucısızınen ve çeşit taqlit dronınen Rusiyedeki Kursk, Orel, Millerovo, Primorsko-Ahtarsk ve işğal etilgen Qırımnıñ Çauda burnundan ücüm etti. Ava darbesiniñ esas yönelişleri Harkiv, Donetsk ve Odesa vilâyetleri oldı, dep haber etti Ukrayina Silâlı quvetleriniñ Ava küçleri.
«Saat 09:00-ğa qadar ava mudafaası memleketniñ şarqı, cenübi ve şimalinde 49 duşman Shahed uçucısızını yoq etti».
Ukrayina arbiyleriniñ malümatına köre, yedi yerde darbe endirildi, dört yerde parçalar tüşti.
Harkiv akimiyeti bildirgenine köre, gece Rusiye uçucısızlarınıñ ücümine Şevçenkivskıy, Saltivskıy ve Slobodskıy rayonları oğradı. Soñki malümatqa köre, 15 insan yaralandı.
Rusiye arbiyleri Ukrayina regionlarına çeşit silâlarnen muntazam surette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, tınç ealini öldürgenine, hastahaneler, mektepler, bala bağçaları, energetika ve suv teminlevi obyektlerini yoq etkenine red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
