«Sarı şerit» areketiniñ faalleri iyünniñ 12-nde, Rusiye Federatsiyasında Rusiye Künü qayd etilgende, işğal etilgen Aqyar, Aqmescit, Donetsk, Lugansk, Mariupol, Melitopol ve Skadovskta Ukrayina timsallerini tarqattı. Fotoresimler areketniñ Telegram kanalında derc etilgen edi.
«Bugün «Rusiye künü», şunıñ içün vaqtınca işğal etilgen topraqlarda Rusiye çöplügi er vaqıt olğanından daa çoq. Amma «Sarı şerit» areketiniñ faalleri Ukrayina timsallerinen stiker ve yazuvlı şiarlar er yerde olsun ve ukrayinalılarnıñ «rus dünyası» mıtlaqa bitecegine ümüt ve işançlarını pekitmek içün elinden kelgenini yaptı. Çeşit şeerlerde, eñ cemaat yerlerinde, bugün yüzlernen risale tarqattıq. Qırım, Donetsk, Lugansk, Herson vilâyetleri, Zaporijjâ serbest olacaqlar!» – dep yazdı fotoresim altında faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
