Ukrayina ateşkes muzakere etilmese, Rusiye ile muzakerelerni devam ettirmege istemey, dep bildirdi Ukrayina Tış işler naziri Andriy Sıbiğa Azatlıq Radiosı mühbiriniñ Kyiv ve Moskva arasında muzakerelerniñ üçünci turı Türkiyede olacaqmı sualine cevap berip.
«Böyle muzakerelerge ihtiyacımız bar, böyle qararlar alınğan, meseleler çezilgen muzakerelerge. İstanbulda keçirilgen soñki turda deñişüv muzakere etilgenini köremiz. Şunıñ içün prezidentler seviyesinde körüşüv olmasını isteymiz. Ve biz böyle körüşüvge azırmız. Soñra baqacaqmız. Biz barışıqnı yaqınlaştırayıq, bizim içün müimi bu. Şimdi barışıq, ateşkes añlaşması bizim içün eñ müim», – dedi Sıbiğa.
Ukrayina ve Rusiyeniñ muzakere gruppalarınıñ soñki körüşüvi iyünniñ 2-nde İstanbulda olıp keçti. Eyyetler ateşkes ve barışıq yolunen davanıñ çezilmesi içün ola bilgen şartlar aqqında memorandumlarnen almaştılar. Ukrayina teklifinde mündericeli muzakereler başlanmazdan evel, şu cümleden topraq meseleleri boyunca, ateşkes ve esirlerniñ deñiştirilmesi kerekligi qayd etile.
Rusiye vesiqasında, esas olaraq, Moskvanıñ soñki vaqıtları qoyğan talapları tekrarlana, şu cümleden, Rusiye tarafından qısmen işğal etilgen regionlardan ukrayin askerlerini çıqarmaq, Ukrayinanıñ NATOğa qoşulmaqtan vazgeçmesi, Rusiye ayırım dep adlandırğan rus tili ve kilsege ait qanunlarnıñ lâğu etilmesi ve ilâhre.
İstanbulda taraflar tek cenk esirlerini ve elâk olğanlarnıñ cesedlerini deñişmege añlaşıp oldı, bu deñişüvler soñki bir qaç künde keçe.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
