Ukrayinağa elâk olğan 1212 arbiyniñ cesedi qaytarıldı, dep bildirdi iyünniñ 11-nde Ukrayina arbiylerge yanaşuv Koordinatsion ştabı.
Ştab malümatına köre, bular Kursk, Harkiv, Lugansk, Donetsk, Zaporijjâ ve Herson vilâyetlerinde elâk olğan arbiyler.
Berilgen malümatqa köre, uquq qoruyıcı organlarnıñ tahqiqatçıları Ukrayina İç işler nazirliginiñ ekspert müessiselerinen beraber elâk olğanlarnıñ şahsiyetlerini «eñ qısqa müddette» belgileycek.
İyünniñ 2-nde Ukrayina ve Rusiye eyyetleri İstanbulda yañı esir deñişüvi aqqında añlaştılar. Elâk olğan 6000 askerniñ cesedini qaytaruv añlaşması tizildi.
O künden soñ esirler eki kere deñişti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
