Ukrayinağa Rusiyeden elâk olğan 1200 insannıñ cesedleri qaytarıldı, dep haber ete iyunniñ 13-nde Cenk esirlerinen munasebet koordinatsion ştabı.
«Rusiye tarafınıñ malümatına köre, cesetler Ukrayina vatandaşlarına ait, hususan arbiylerge. Qaytaruv İstanbuldaki añlaşmalarğa köre yapıldı», – dep aytıla beyanatta.
Ştab uquq qoruyıcı organlarnıñ tahqiqatçıları İç işler nazirliginiñ ekspert müessiselerinen beraber qaytarılğan cesetlerniñ kerekli ekspertizalarını yapacaqlar, dep qoştı.
Müessise Qızıl Haç Halqara Komitetine yardımları, Ukrayina Silâlı Quvetleriniñ hadimlerine elâk olğanlarnıñ mahsus müessiselerge ketirilüvi ve uquq qoruyıcı organlarına ve mahkeme-tibbiy ekspertizağa berilüvi içün teşekkürler bildirdi.
İyünniñ 2-nde Ukrayina ve Rusiye eyyetleri İstanbulda yañı esir deñişüvleri aqqında añlaştılar. Mudafaa naziri Rustem Umerov bildirgenine köre, raqamlarğa degil, belli kategoriyalarğa emiyet bermege añlaşıldı: ağır yaralanğan ve ağır hasta cenk esirleriniñ «episini» deñişmek ve ekinci kategoriya – 18 yaşından 25 yaşına qadar yaş askerler. Bunıñnen beraber elâk olğan 6000 askerniñ cesedini qaytarmağa añlaştılar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
