Ukrayina prezidenti Volodımır Zelenskıy iyünniñ 12-nde Rusiye ile daa bir büyük esir deñişüvi oldı, dep bildirdi.
«Bugün ordumıznıñ askerleri, milliy gvardiya, sıñırcılarımız evde. Episi tedaviylenmeli, olarğa kerekli yardım kösterilecek. Ağır yaralanğan ve ağır hasta arbiyler ekinci kere qayta. Episini Rusiye esirliginden qaytarmaq içün çalışmağa devam etemiz. Bu esirlerni kerçekleştirmege yardım etken er keske teşekkürler. Er bir erkek ve qadın evde, Ukrayinada olsun», – dep yazdı devlet yolbaşçısı.
Büyük esir deñişüviniñ keçken seferlerinde olğanı kibi, azat etilgen ukrayinalılarnıñ sayısı aytılmadı.
Ukrayina ve Rusiye iyünniñ 9-nda cenk esirlerini deñişip başladı. Cenk esirleri meseleleri koordinatsion ştabı bildirgenine köre, Ukrayinağa 25 yaşına qadar arbiylerniñ birinci gruppası azat etilip qayttı.
Ukrayina Mudafaa nazirligi Baş istihbarat idaresiniñ yolbaşçısı Kırılo Budanov iyünniñ 8-nde bildirgenine köre, Ukrayina ve Rusiye arasında elâk olğan arbiylerniñ cesedlerini deñişüv kelecek aftağa planlaştırıldı, ve Rusiye tarafı bu añlaşmanı bile.
İyünniñ 2-nde Ukrayina ve Rusiye eyyetleri İstanbulda yañı esir deñişüvleri aqqında añlaştılar. Mudafaa naziri Rustem Umerov bildirgenine köre, raqamlarğa degil, belli kategoriyalarğa emiyet bermege añlaşıldı: ağır yaralanğan ve ağır hasta cenk esirleriniñ «episini» deñişmek ve ekinci kategoriya – 18 yaşından 25 yaşına qadar yaş askerler. Bunıñnen beraber elâk olğan 6000 askerniñ cesedini qaytarmağa añlaştılar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
